VIQUEQUE, 21 May 2024 (TATOLI)
Diretór Servisu Obra Públika Munisípiu Viqueque, Casildo Gomes Soares, informa daudaun Institutu Jestaun Ekipamentu Apoiu Dezenvolvimentu Infraestutura, Institutu Públiku (IGEADI,I.P), desteka ona ekipamentu iha mota Ailembada ne’ebé lokaliza iha suku Babulo, postu Uatulari atu halo normaliza tanba afeta ona ba uma-kain 19.
“IGEADI,I.P finaliza ona normaliza iha mota Wetuku, suku Bahalarauin, nune’e sira kontinua destaka ekipamentu ba postu Uatulari, hodi hala’o normalizasaun ba mota Ailembata ne’ebé ameasa abitante sira-nia uma no movimentu transporte públiku bá Uatucarbau”, Casildo Gomes Soares, hateten ba Agência Tatoli, iha ninia kna’ar fatin Beloi, ohin.
Nia hatutan, sei hasai mós sedimentasaun iha mota laran atu udan tuun tan labele afeta ba komunidade nia uma.
“Hafoin halo tiha normaliza iha mota Ailembata, ami halo ona koordenasaun ho ekipa IGEADI ba halo mós normalizasaun dalan Uatulari antiga, ne’ebé maka foin lalais udan boot difikulta ba transporte públiku sira,” nia afirma.
Dalan liga bá Uatulari atas to’o Iraler kuaze kilometru 31, seidauk hetan reabilitasaun ruma, nune’e difikulta abitante suku neen hodi lori nia produtu lokál mai iha merkadu.
Antes ne’e xefe suku Babulo Mario Tridade, haktuir, Estrada rurál liga ba Uatulari antiga ne’ebé sai impedementu ba abitante sira-ne’ebé hela iha área rurál, maioria abitante sira moris ba vida agrikultór, maibé sira-nia produtu labele asesu ba merkadu tanba kondisaun estrada.
Jornalista : Vitorino Lopes da Costa
Editór : Florencio Miranda Ximenes