IGEADI. IP COVALIMA- Komunidade Suku Tolu, iha Postu Administrativu Zumalai, Munisipiu Covalima, hanesan Suku Lour, Zulo no Fatuleto husu agradese ba Institutu Gestaun Equipamentus no Apoiu Dezenvolvimentu Infraestrutura. Institutu Publiku. (IGEADI.IP), tanba salva ona sira husu risku dezastre naturais.
Liafuan agradesementu nee hato husi Xefe Suku Lour, Martinho Julio Barreto Alves, iha nia knar fatin Naegidar Suku Lour, Postu Administrativu Zumalai, Munisipiu Covalima, Sabadu (08/06/2024).
“ Udan hahu iha dia 30 fulan Maio to dia 6 fulan Junu, rezulta bee tama komunidade umakain 30 nia uma iha Suku Lour, estraga komunidade nia uma, Plantasaun no lori komunidade nia Animal sira hanesan Karau Bibi no Fahi, agora senti diak ituan ona tanba ekipa husi IGEADI.IP, mai normaliza ona mota, tanba nee lori komunidade Suku Lour nia naran, husu agradese ba Governu liu-liu IGEADI.IP “ tenik Autoridade lokal nee.
Autoridade lokal nee husu ba Governu liu husi Ministeriu Obras Publikas (MOP), atu hari ona moru protesaun atu nune tempu udan mota boot bele proteze komunidade sira husi risku dezastre naturais.
Kordenador Eskola Ensinu Baziku Filial (EBF), Naegidar, Caitano Barreto, hateten, bainhira tempu udan Mota boot fo ameasa ba edefisiu EBC Naegidar no komunidade Naegidar nia uma tanba laiha moru portesaun.
“ Mota nee ameasa eskola ameasa komunidade nia uma, foin lalais udan boot mota tama komunidade nia uma, hodi estraga sasan barak inklui lori komunidade nia ainimal tanba nee ami husu Governu atu halo moru protesaun “ dehan Kordenador EBF Filial Naegidar, Caitano Barreto.
Iha fatin hanesan komunidade, Muzinho Magno, husu atu Governu hadia lalais estrada dirasaun Postu Administrativu Zumalai, Munisipiu Covalima ba Postu Bobobaro, Munisipiu Bobonaro, neebe kotu kauza husi inundasaun, neebe akontese iha fulan kotuk.
“ Estrada dirasaun Postu Administrativu Zumalai Munisipiu Covalima ba Postu Adminitrativu Bobobaro Munisipiu Bobonaru, aat hotu difikulta ami povu atu buka moris, antes ne ekipa IGEADI.IP halo ona normalizasaun maibe udan boot, mosu dezastre naturais sobu fali deit, ami agrandese tebes IGEADI.IP neebe sempre iha bainhira ami presiza maibe sira mai halo normalizasaun provizoriu deit bainhira tempu udan aat fali deit, tanba nee ami husu ba Governu atu tau matan ba ami nia estrada “ tenik Muzinho Magno
Hafoin simu informasaun, konaba inundasaun neebe akontese iha suku tolu iha Postu Administrativu Zumalai, Munisipiu Covalima, Prezidente IGEADI. IP, Dra. Ana Paula da Cruz, orienta kedas Brigada Maria Tapo, halo normalizasaun ba monta iha suku Lour, halo melloramentu ba estrada iha Suku Zulo no Suku Fatuleto.