BOBONARO, 02 Maiu 2024 (TATOLI)
Diresaun Servisu Munisipál Obra Públika (DSMOP), Autoridade Munisipál Bobonaro, kinta ne’e submete ona pedidu ba Institutu Jestaun Ekipamentu Apoia Dezenvolvimentu Infraestrututa, Institutu Públiku (IGEADI, sigla portugués) atu halo normalizasaun ba estrada iha área Zulo-il, suku Lontas, postu administrativu Lolotoe ne’ebé hetan estragu hafoin akontese dezastre naturál ka erosaun foin lalais ne’e.
Diretór Servisu Munisipál Obra Públika, Autoridade Munisipál Bobonaro, Marcelino Goncalves Godinho, hateten konteúdu pedidu ne’e husu IGEADI,IP atu halo normalizasaun emerjénsia hodi fasilita movimentu transporte Públiku no privada asesu ba mai.
Notísia relevante: MOP sei normaliza estrada kotu iha Zulo-il Lontas
“Ita manda ona karta ba ohin dadeer hatama ona iha IGEADI nasionál husu atu urjentimente atu mobiliza ekipamentu pezadu iha tempu badak nia laran, karik karta tama mak Prezidente IGEADI,IP hatún despaxu ba ekipa Brigada Maria-Tapo, entaun iha momentu ne’e kedas iha halo mobilizasaun ba Zulo-il hodi normaliza hikas estrada ne’ebé mak hetan estragus, nune’e bkomunidade Lolotoe bele halo sira-nia movimentu,” nia informa ba jornalista sira iha kna’ar fatin, kinta ne’e.
Nia husu ba komunidade Lolotoe atu hein ho pasiénsia oituan no laran taridu, tanba konteúdu pedidu ne’e husu ekipamentu IGEADI,IP atu mantein iha Zulo-il nune’e bainhira akontese dezastre naturál bele halo kedas intervensaun imediata.
Nia salienta, hafoin halo normalizasaun estrada ezistente kontinua hetan estragus, maka sei buka alternativu seluk hodi muda trosu ba fatin seluk.
“Ita la espera natureza ita labele ho forsa ema nia hasoru, tanba ne’e rai halai nafatin, ami planu atu muda ba sorin fali, maibé ekipa laboratóriu sei mai teste lai rai ne’e, tanba karik ita atu muda ninia estrutura rai hanesan, ne’e mos ita labele rezolve problema. Sé ita teste mak bele, entaun ita mantein, husu Autoridade lokál halo tan proposta ida, nune’e ita bele muda,” nia katak.
Enkuantu estrada referidu iha tinan kotuk governu halo ona reablitasaun, maibé foin lalais ne’e hetan fali estragus hafoin akontese udan boot, tanba estrutura rai la metin.
Tuir dadus postu administrativu Lolotoe iha suku hitu, aldeia 20 ho totál populasaun 7,695 no xefe família 1,591.
Jornalista: Sérgio da Cruz
Editór:Evaristo Soares Martins